ยทา มหากฏฺฐปุญฺโช อาทิตฺโต ธมธมายติ ๑

ตทุปฺปติตฺวา ปปติ ๒ มชฺเฌ ชาลสิขนฺตเร ฯ

ยถา สีโตทกํ นาม ปวิฏฺฐํ ยสฺส กสฺสจิ

สเมติ ทรถปริฬาหํ อสฺสาทํ เทติ ปีติ จ ฯ

ตเถว ชลิตํ อคฺคึ ปวิฏฺฐสฺส มมํ ตทา

สพฺพํ สเมติ ทรถํ ยถา สีโตทกํ วิย ฯ

ฉวิ จมฺมญฺจ มํสญฺจ นฺหารุ อฏฺฐิ หทยพนฺธนํ

เกวลํ สกลํ กายํ พฺราหฺมณสฺส อทาสหนฺติ ฯ

สสปณฺฑิตจริยํ ทสมํ ฯ

ตสฺสุทฺทานํ

อกิตฺติ พฺราหฺมโณ สงฺโข กุรุราชา ธนญฺชโย

มหาสุทสฺสโน ราชา มหาโควินฺทพฺราหฺมโณ ฯ

เนมิ ๓ จนฺทกุมาโร จ สิวิ เวสฺสนฺตโร สโส

อหเมว ตทา อาสึ โย เต ทานวเร อทา ฯ

เอเต ทานปริกฺขารา เอเต ทานสฺส ปารมี

ชีวิตํ ยาจเก ทตฺวา อิมํ ๔ ปารมิ ปูรยึ ฯ

ภิกฺขาย อุปคตํ ทิสฺวา สกตฺตานํ ปรจฺจชึ

ทาเนน เม สโม นตฺถิ เอสา เม ทานปารมีติ ฯ

ทานปารมิตา นิฏฺฐิตา ฯ

#๑ ยุ. ธูมมายติ ฯ ๒ ม. ปปตึ ฯ ๓ ม. ยุ. นิมิ ฯ ๔ ยุ. อิทํ ฯ