เอเต ๑ สพฺเพ สีลพลา ปริกฺขารา ปเทสิกา

ชีวิตํ ปริรกฺขิตฺวา สีลานิ อนุรกฺขิสฺสํ ฯ

สงฺขปาลสฺส เม สโต สพฺพกาลํปิ ชีวิตํ

ยสฺส กสฺสจิ นิยฺยนฺตํ ๒ ตสฺมา สา สีลปารมีติ ฯ

สีลปารมินิทฺเทโส นิฏฺฐิโต ฯ

๓. เนกฺขมฺมาทิปารมิตา

ปฐมํ ยุธญฺชยจริยํ

[๒๑] ยทาหํ อมิตยโส ราชปุตฺโต ยุธญฺชโย

อุสฺสาวพินฺทุํ สุริยาตเป ปติตํ ทิสฺวาน สํวิชึ ฯ

ตเมวาธิปตึ ๓ กตฺวา สํเวคมานุพฺรูหยึ

มาตุปิตุญฺจ วนฺทิตฺวา ปพฺพชฺชมนุยาจิหํ ฯ

ยาจนฺติ มํ ปญฺชลิกา สเนคมา สรฏฺฐกา

อชฺเชว ปุตฺต ปฏิปชฺช อิทฺธํ ผีตํ มหามหึ ฯ

สราชเก สโอโรเธ สเนคเม สรฏฺฐเก

กรุณํ ปริเทวนฺเต อนเปกฺโข ๔ ปริจฺจชึ ฯ

เกวลํ ปฐวีรชฺชํ ญาติปริชนํ ยสํ

จชมาโน น จินฺเตสึ โพธิยาเยว การณา ฯ

มาตา ปิตา น เม เทสฺสา นปิ เม เทสฺสา ๕ มหายสา

สพฺพญฺญุตํ ปิยํ มยฺหํ ตสฺมา รชฺชํ ปริจฺจชินฺติ ฯ

ยุธญฺชยจริยํ ปฐมํ ฯ

#๑ ม. เอเต นว สีลพลา ฯ ๒ ม. นิยฺยตฺตํ ฯ ๓ ม. ยุ. ตนฺเยวาธิปตึ ฯ #๔ ม. อนเปกฺโขว ฯ ยุ. ... หิ ฯ ๕ ม. ยุ. เทสฺสํ มหายสํ ฯ