ทุติยํ โสมนสฺสจริยํ

[๒๒] ปุนาปรํ ยทา โหมิ อินฺทปตฺเถ ปุรุตฺตเม

กามิโต ทยิโต ปุตฺโต โสมนสฺโสติ วิสฺสุโต ฯ

สีลวา คุณสมฺปนฺโน กลฺยาณปฏิภานวา

วุฑฺฒาปจายี หิริมา สงฺคเหสุ จ โกวิโท ฯ

ตสฺส รญฺโญ ปฏิกโร อโหสิ กุหกตาปโส

อารามํ มาลาคจฺฉญฺจ โรปยิตฺวาน [๑] ชีวติ ฯ

ตมหํ ทิสฺวาน กุหกํ ถุสราสึว อตณฺฑุลํ

ทุมํว อนฺโตสุสิรํ กทลึว อสารกํ ฯ

นตฺถิมสฺส สตํ ธมฺโม สามญฺญา อปคโต อยํ

หิริสุกฺกธมฺมชหิโต ชีวิตวุตฺติการณา ฯ

กุปิโต อาสิ ๒ ปจฺจนฺโต อฏวีหิ จรนฺติหิ ๓

ตํ นิเสเธตุํ คจฺฉนฺโต อนุสาสิ ปิตา มม ฯ

มา ปมชฺช ตุวํ ตาต ชฏิเล ๔ อุคฺคตาปเน

ยทิจฺฉกํ ปวตฺเตหิ สพฺพกามทโท หิ โส ฯ

ตมหํ คนฺตฺวานุปฏฺฐานํ อิทํ วจนมพฺรวึ

กจฺจิ เต คหปติ กุสลํ กึ วา เต อาหรียตุ ฯ

เตน โส กุปิโต อาสิ กุหโก มานนิสฺสิโต

ฆาฏาเปมิ ตุวํ อชฺช รฏฺฐา ปพฺพาชยามิ วา ฯ #๑ ยุ. โส ฯ ๒ ม. อหุ ฯ ยุ. อโหสิ ฯ ๓ ยุ. อปรนฺติหิ ฯ ๔ ม. ยุ. ชฏิลํ #อุคฺคตาปนํ ฯ