เอเต องฺเค อธิฏฺฐาย วสฺสานิ โสฬสํ วสึ
อธิฏฺฐาเนน [๑] สโม นตฺถิ เอสา เม อธิฏฺฐานปารมีติ
มูคผกฺขจริยํ ฉฏฺฐํ ฯ
สตฺตมํ กปิลราชจริยํ
[๒๗] ยทา อหํ กปิ อาสึ นทีกูเล ทรีสเย
ปีฬิโต สสสุมาเรน ๒ คมนํ น ลภามหํ ฯ
ยโมฺหกาเส อหํ ฐตฺวา โอรา ปรํ ปตามหํ
ตตฺถจฺฉิ สตฺตุวธโก กุมฺภิโล ลุทฺธทสฺสโน ฯ
โส มํ อสํสิ เอหีติ อหมฺเปมีติ ตํ วทึ ๓
ตสฺส มตฺถกมกฺกมฺม ปรกูเล ปติฏฺฐหึ ฯ
น ตสฺสาลิกํ ภณิตํ ยถา วาจํ อกาสหํ
สจฺเจน เม สโม นตฺถิ เอสา เม สจฺจปารมีติ ฯ
กปิลราชจริยํ สตฺตมํ ฯ
อฏฺฐมํ สจฺจสวฺหยปณฺฑิตจริยํ
[๒๘] ปุนาปรํ ยทา โหมิ ตาปโส สจฺจสวฺหโย
สจฺเจน โลกํ ปาเลสึ สมคฺคํ ชนมกาสหนฺติ ฯ
สจฺจสวฺหยปณฺฑิตจริยํ อฏฺฐมํ ฯ
#๑ ม. เม ฯ ๒ ม. สุสุมาเรน ฯ ยุ. สํสุมาเรน ฯ ๓ ม. วตึ ฯ ยุ. วทิ ฯ