สห สจฺเจ กเต มยฺหํ วิสเวเคน เวธิโต

อพุชฺฌิตฺวาน วุฏฺฐาสิ อโรโค วาสิ ๑ มาณโว

สจฺเจน เม สโม นตฺถิ เอสา เม สจฺจปารมีติ ฯ

กณฺหทีปายนจริยํ เอกาทสมํ ฯ

ทฺวาทสมํ สุตโสมจริยํ

[๓๒] ปุนาปรํ ยทา โหมิ สุตโสโม มหีปติ๋

คหิโต โปริสาเทน พฺราหฺมเณ สงฺครํ สรึ ฯ

ขตฺติยานํ เอกสตํ อาวุณิตฺวา กรตเล

เอเต สมฺมมิลาเปตฺวา ยญฺญตฺเถ อุปนยี มมํ ฯ

อาปุจฺฉิ มํ โปริสาโท กึ ตฺวํ อิจฺฉสิ นิสฺสชํ

ยถามตึ เต กาหามิ ยทิ เม ตฺวํ ปุเนหิสิ ฯ

ตสฺส ปฏิสุณิตฺวาน ปเญฺห อาคมนํ มม

อุปคนฺตฺวา ปุรํ รมฺมํ รชฺชํ นิยฺยาทยึ ตทา ฯ

อนุสฺสริตฺวา สตํ ธมฺมํ ปุพฺพกํ ชินเสวิตํ

พฺราหฺมณสฺส ธนํ ทตฺวา โปริสาทํ อุปาคมึ ฯ

นตฺถิ เม สํสโย ตตฺถ ฆาฏยิสฺสติ วา น วา

สจฺจวาจานุรกฺขนฺโต ชีวิตํ จชิตุมุปาคมึ

สจฺเจน เม สโม นตฺถิ เอสา เม สจฺจปารมีติ ฯ

สุตโสมจริยํ ทฺวาทสมํ ฯ

#๑ ม. ยุ. จาสิ ฯ