อฏฺฐจตฺตาฬีโส นฬมาลิวคฺโค

ปฐมํ นฬมาลิยตฺเถราปทานํ (๔๗๑)

[๖๑] สุวณฺณวณฺณํ สมฺพุทฺธํ อาหุตีนํ ปฏิคฺคหํ

ปวนคฺเคน คจฺฉนฺตํ อทฺทสํ โลกนายกํ ฯ

นฬมาลํ คเหตฺวาน นิกฺขมนฺโต จ ตาวเท

ตตฺถทฺทสาสิ สมฺพุทฺธํ โอฆติณฺณมนาสวํ ฯ

ปสนฺนจิตฺโต สุมโน นฬมาลํ อปูชยึ

ทกฺขิเณยฺยํ มหาวีรํ สพฺพโลกานุกมฺปกํ ฯ

เอกตฺตึเส อิโต กปฺเป ยํ ปุปฺผํ ๑ อภิโรปยึ

ทุคฺคตึ นาภิชานามิ พุทฺธปูชายิทํ ผลํ ฯ

กิเลสา ฌาปิตา มยฺหํ ภวา สพฺเพ สมูหตา

นาโคว พนฺธนํ เฉตฺวา วิหรามิ อนาสโว ฯ

สฺวาคตํ วต เม อาสิ มม พุทฺธสฺส สนฺติเก

ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา นฬมาลิโย เถโร อิมา คาถาโย อภาสิตฺถาติ ฯ

นฬมาลิยตฺเถรสฺส อปทานํ สมตฺตํ ฯ

#๑ ม. ...มาลมภิโรปยึ ฯ