ปญฺจมํ กุมฺมาสทายกตฺเถราปทานํ (๔๗๕)
[๖๕] เอสนาย จรนฺตสฺส วิปสฺสิโน มเหสิโน
ริตฺตกํ ปตฺตํ ทิสฺวาน กุมฺมาสํ ปูรยึ อหํ ฯ
เอกนวุเต อิโต กปฺเป ยํ ภิกฺขํ อททึ ตทา
ทุคฺคตึ นาภิชานามิ กุมฺมาสสฺส อิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา กุมฺมาสทายโก เถโร อิมา คาถาโย อภาสิตฺถาติ ฯ
กุมฺมาสทายกตฺเถรสฺส อปทานํ สมตฺตํ ฯ
ฉฏฺฐํ กุสฏฺฐกทายกตฺเถราปทานํ (๔๗๖)
[๖๖] กสฺสปสฺส ภควโต พฺราหฺมณสฺส วุสีมโต
ปสนฺนจิตฺโต สุมโน กุสฏฺฐกมทาสหํ ฯ
อิมสฺมึเยว กปฺปสฺมึ กุสฏฺฐกมทาสหํ
ทุคฺคตึ นาภิชานามิ กุสฏฺฐกสฺสิทํ ผลํ ฯ