วลฺลิกาโร ปานธิโท อโถ ปุฬินจงฺกโม
คาถาโย ปญฺจนวุติ คณิตาโย วิภาวิภิ ฯ
นฬมาลิวคฺโค อฏฺฐจตฺตาฬีโส ฯ
_______________________
เอกูนปญฺญาสโม ปํสุกูลวคฺโค
ปฐมํ ปํสุกูลสญฺญกตฺเถราปทานํ (๔๘๑)
[๗๑] ติสฺโส นามาสิ ภควา สยมฺภู โลกนายโก ๑
ปํสุกูลํ ฐเปตฺวาน วิหารํ ปาวิสี ชิโน ฯ
สชฺชิตํ ๒ ธนุมาทาย ปกฺขิตฺตสลิลํ ๓ อหํ
มณฺฑลคฺคํ คเหตฺวาน กานนํ ปาวิสึ อหํ ฯ
ตตฺถทฺทสํ ปํสุกูลํ ทุมคฺเค ลคฺคิตํ ตทา
จาปํ ตตฺเถว นิกฺขิปฺป สีเส กตฺวาน อญฺชลึ ฯ
ปสนฺนจิตฺโต สุมโน วิปุลาย จ ปีติยา
พุทฺธเสฏฺฐํ สริตฺวาน ปํสุกูลํ อวนฺทหํ ฯ
เทฺวนวุเต อิโต กปฺเป ยํ ปํสุกูลมวนฺทหํ
ทุคฺคตึ นาภิชานามิ วนฺทนาย อิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ #๑ ม. ยุ. อคฺคปุคฺคโล ฯ ๒ ม. วินตํ ฯ ยุ. ติยนฺตํ ฯ ๓ ม. ภกฺขตฺถาย จรึ #อหํ ฯ ยุ. อกฺขิตฺโต ยมรึ อหํ ฯ