Anāpatti— alajjiniṁ nikkaḍḍhati vā nikkaḍḍhāpeti vā, tassā parikkhāraṁ nikkaḍḍhati vā nikkaḍḍhāpeti vā, ummattikaṁ nikkaḍḍhati vā nikkaḍḍhāpeti vā, tassā parikkhāraṁ nikkaḍḍhati vā nikkaḍḍhāpeti vā, bhaṇḍanakārikaṁ kalahakārikaṁ vivādakārikaṁ bhassakārikaṁ saṅghe adhikaraṇakārikaṁ nikkaḍḍhati vā nikkaḍḍhāpeti vā, tassā parikkhāraṁ nikkaḍḍhati vā nikkaḍḍhāpeti vā, antevāsiniṁ vā saddhivihāriniṁ vā na sammā vattantiṁ nikkaḍḍhati vā nikkaḍḍhāpeti vā, tassā parikkhāraṁ nikkaḍḍhati vā nikkaḍḍhāpeti vā, ummattikāya, ādikammikāyāti. Pañcamasikkhāpadaṁ niṭṭhitaṁ. Theravāda Vinaya
36. Saṁsaṭṭhasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī saṁsaṭṭhā viharati gahapatināpi gahapatiputtenapi.