Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma bhikkhunī ekā gāmantaraṁ gacchissatī”ti …pe… “saccaṁ kira, bhikkhave, bhikkhunī ekā gāmantaraṁ gacchatī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, bhikkhunī ekā gāmantaraṁ gacchissati. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī ekā gāmantaraṁ gaccheyya, ayampi bhikkhunī paṭhamāpattikaṁ dhammaṁ āpannā nissāraṇīyaṁ saṅghādisesan”ti. Evañcidaṁ bhagavatā bhikkhunīnaṁ sikkhāpadaṁ paññattaṁ hoti. Tena kho pana samayena dve bhikkhuniyo sāketā sāvatthiṁ addhānamaggappaṭipannā honti. Antarāmagge nadī taritabbā hoti. Atha kho tā bhikkhuniyo nāvike upasaṅkamitvā etadavocuṁ—“sādhu no, āvuso, tārethā”ti. “Nāyye, sakkā ubho sakiṁ tāretun”ti. Eko ekaṁ uttāresi. Uttiṇṇo uttiṇṇaṁ dūsesi. Anuttiṇṇo anuttiṇṇaṁ dūsesi. Tā pacchā samāgantvā pucchiṁsu— “kaccisi, ayye, appadhaṁsitā”ti? “Padhaṁsitāmhi, ayye. Tvaṁ pana, ayye, appadhaṁsitā”ti? “Padhaṁsitāmhi, ayye”ti.