อิตฺถํ สุทํ อายสฺมา จนฺทนมาลิโย เถโร อิมา คาถาโย อภาสิตฺถาติ ฯ
จนฺทนมาลิยตฺเถรสฺส อปทานํ สมตฺตํ ฯ
ฉฏฺฐํ ธาตุปูชกตฺเถราปทานํ (๔๘๖)
[๗๖] นิพฺพุเต โลกนาถมฺหิ สิทฺธตฺเถ โลกนายเก
มมญฺญาตี สมาเนตฺวา ธาตุปูชํ อกาสหํ ฯ
จตุนวุเต อิโต กปฺเป ยํ ธาตุมภิปูชยึ
ทุคฺคตึ นาภิชานามิ ธาตุปูชายิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา ธาตุปูชโก เถโร อิมา คาถาโย อภาสิตฺถาติ ฯ
ธาตุปูชกตฺเถรสฺส อปทานํ สมตฺตํ ฯ
สตฺตมํ ปุฬินุปฺปาทกตฺเถราปทานํ (๔๘๗)
[๗๗] ปพฺพเต หิมวนฺตมฺหิ เทวโล นาม ตาปโส
ตตฺถ เม จงฺกโม อาสิ อมนุสฺเสหิ มาปิโต ฯ