ฉฏฺฐํ อชฺชุนปุปฺผิยตฺเถราปทานํ (๕๑๖)

[๑๐๖] จนฺทภาคานทีตีเร อโหสึ กินฺนโร ตทา

อทฺทสํ วิรชํ พุทฺธํ สยมฺภุํ อปราชิตํ ฯ

ปสนฺนจิตฺโต สุมโน เวทชาโต กตญฺชลี

คเหตฺวา อชฺชุนปุปฺผํ สยมฺภุํ อภิปูชยึ ฯ

เตน กมฺเมน สุกเตน เจตนาปณิธีหิ จ

ชหิตฺวา กินฺนรํ เทหํ ตาวตึสํ อคญฺฉหํ ฯ

ฉตฺตึสกฺขตฺตุํ เทวินฺโท เทวรชฺชมการยึ

ทสกฺขตฺตุํ จกฺกวตฺติ มหารชฺชมการยึ ฯ

ปเทสรชฺชํ วิปุลํ คณนาโต อสงฺขยํ

สุเขตฺเต ๑ วปฺปิตํ วีชํ สยมฺภุสฺมึ อโหสิ ๒ เม ฯ

กุสลํ วิชฺชเต มยฺหํ ปพฺพชึ อนคาริยํ

ปูชารโห อหํ อชฺช สกฺยปุตฺตสฺส สาสเน ฯ

กิเลสา ฌาปิตา มยฺหํ ภวา สพฺเพ สมูหตา

นาโคว พนฺธนํ เฉตฺวา วิหรามิ อนาสโว ฯ

สฺวาคตํ วต เม อาสิ มม พุทฺธสฺส สนฺติเก

ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ยุ. สุเขตฺเตว ผีตํ พีชํ ฯ ๒ ม. ยุ. อโห มมํ ฯ