นวมํ สพฺพผลทายกตฺเถราปทานํ (๕๑๙)

[๑๐๙] วรุโณ นาม นาเมน พฺราหฺมโณ มนฺตปารคู

ฉฑฺเฑตฺวา ทส ปุตฺตานิ วนมชฺโฌคหึ ตทา ฯ

อสฺสมํ สุกตํ กตฺวา สุวิภตฺตํ มโนรมํ

ปณฺณสาลํ กริตฺวาน วสามิ ปวเน อหํ ฯ

ปทุมุตฺตโร โลกวิทู อาหุตีนํ ปฏิคฺคโห

มมุทฺธริตุกาโม โส อาคญฺฉิ มม อสฺสมํ ฯ

ยาวตา วนสณฺฑมฺหิ โอภาโส วิปุโล อหุ

พุทฺธสฺส อานุภาเวน ปชฺชลิ ปวนํ ตทา ฯ

ทิสฺวาน ปาฏิหิริยํ ๑ พุทฺธเสฏฺฐสฺส ตาทิโน

ปตฺตปุฏํ คเหตฺวาน ผเลน ปูรยึ อหํ ฯ

อุปคนฺตฺวาน สมฺพุทฺธํ สห ๒ ขาริมทาสหํ

อนุกมฺปาย เม พุทฺโธ อิทํ วจนมพฺรวิ ฯ

ขาริภารํ คเหตฺวาน ปจฺฉโต เอหิ เม ตุวํ

ปริภุตฺเตว ๓ สงฺฆมฺหิ ปุญฺญํ ๔ ตว ภวิสฺสติ ฯ

ปุฏกนฺตํ คเหตฺวาน ภิกฺขุสงฺฆสฺสทาสหํ

ตตฺถ จิตฺตํ ปสาเทตฺวา ตุสิตํ อุปปชฺชหํ ฯ

ตตฺถ ทิพฺเพหิ นจฺเจหิ คีเตหิ วาทิเตหิ จ

ปุญฺญกมฺเมน สํยุตฺโต ๕ อนุโภมิ ยสํ ๖ อหํ ฯ #๑ ม. ...ตํ ปาฏิหีรํ ฯ ยุ. ทิสฺวานหํ ปาฏิหีรํ ฯ ๒ ยุ. สาขาริกํ อทาสหํ ฯ #๓ ม. ยุ. ... จ ฯ ๔ ยุ. ปุญฺญํ ตํว ฯ ๕ ม. สํยุตฺตํ ฯ ๖ ม. สทา สุขํ ฯ