นาหํ เอวมิเธกจฺจํ อญฺญํ ปสฺสามิ สาวกํ

ตสฺมา ตทคฺเค เอสคฺโค เอวํ ธาเรถ ภิกฺขโว ฯ

ตทาหํ วิมฺหิโต หุตฺวา วากฺยํ สุตฺวา มโนรมํ

หิมวนฺตํ คมิตฺวาน อาหิตฺวา ปุปฺผสญฺจยํ ฯ

ปูเชตฺวา โลกสรณํ ตํ ฐานํ อภิปตฺถยึ

ตทา มมาสยํ ญตฺวา พฺยากาสิ ๑ สรณาลโย ฯ

ปสฺสเถตํ อิสิวรํ นิทฺธนฺตกนกตฺตจํ

อุทคฺคโลมมานสํ ๒ อจลํ ปญฺชลึ ฐิตํ ฯ

หาสํ สุปุณฺณนยนํ พุทฺธวณฺณคตาสยํ

ธมฺมชํ ๓ อุคฺคหทยํ อมตาสิตฺตสนฺนิภํ ฯ

กจฺจานสฺส คุณํ สุตฺวา ตํ ฐานํ ปตฺถยึ ๔ ฐิโต

อนาคตมฺหิ อทฺธาเน โคตมสฺส มหามุเน ฯ

ตสฺส ธมฺเมสุ ทายาโท โอรโส ธมฺมนิมฺมิโต

กจฺจาโน นาม นาเมน เหสฺสติ สตฺถุสาวโก ฯ

พหุสฺสุโต มหาญาณี อธิปฺปายวิทู มุนิ ๕

ปาปุณิสฺสติ ตํ ฐานํ ยถายํ พฺยากโต มยา ฯ

สตสหสฺเส อิโต กปฺเป ยํ กมฺมมกรึ ตทา

ทุคฺคตึ นาภิชานามิ พุทฺธปูชายิทํ ผลํ ฯO

ทุเว ภเว สํสรามิ เทวตฺเต อถ มานุเส

อญฺญํ คตึ น ชานามิ ๖ พุทฺธปูชายิทํ ผลํ ฯ #๑ ม. ... สรณญฺชโห ฯ ๒ ม. อุทคฺคโลมํ ปีณํสํ ฯ ยุ. ... ปีณสํ ฯ ๓ ยุ. #ธมฺมปฏิคฺคหวรํ ฯ ๔ ม. ยุ. ปตฺถยํ ฯ ๕ โป. ม. ยุ. มุเน ฯ ๖ ม. ยุ. น #คจฺฉามิ ฯ