เทฺวนวุเต อิโต กปฺเป ผุสฺโส อุปฺปชฺชิ นายโก

ทุราสโท ทุปสโห สพฺพโลกุตฺตโม ชิโน ฯ

จรเณน จ สมฺปนฺโน พฺรหฺมา ๑ อุชุ ปตาปวา

หิเตสี สพฺพสตฺตานํ พหุํ โมเจสิ พนฺธนา ฯ

นนฺทารามวเร ๒ ตสฺส อโหสึ ปุสฺสโกกิโล

คนฺธกุฏิสมาสนฺเน อมฺพรุกฺเข วสามหํ ฯ

ตทา ปิณฺฑาย คจฺฉนฺตํ ทกฺขิเณยฺยํ ชินุตฺตมํ

ทิสฺวา จิตฺตํ ปสาเทตฺวา มญฺชุนา อภิกูชหํ ๓ ฯ

ราชุยฺยานํ ตทา คนฺตฺวา สุปกฺกํ กนกตฺตจํ

อมฺพปิณฺฑํ คเหตฺวาน สมฺพุทฺธสฺโสปนามยึ ฯ

ตทา เม จิตฺตมญฺญาย มหาการุณิโก ชิโน

อุปฏฺฐากสฺส หตฺถโต ปตฺตํ ปคฺคณฺหิ นายโก ฯ

อทาสึ ๔ หฏฺฐจิตฺโตหํ อมฺพปิณฺฑํ มหามุเน

ปตฺเต ปกฺขิปฺป ปกฺเขหิ ปญฺชลึ กตฺวาน มญฺชุนา ฯ

สเรน รชนีเยน สวนีเยน มญฺชุนา ๕

วสฺสนฺโต พุทฺธปูชตฺถํ นิทฺทํ ๖ คนฺตฺวา นิปชฺชหํ ฯ

ตทา มุทิตจิตฺตํ มํ พุทฺธเปมคตาสยํ

สกุณคฺฆิ อุปาคนฺตฺวา ฆาตยิ ทุฏฺฐมานโส ๗ ฯ

ตโต จุโตหํ ตุสิเต อนุโภตฺวา มหาสุขํ

มนุสฺสโยนิมาคญฺฉึ ตสฺส กมฺมสฺส วาหสา ฯ #๑ ม. ยุ. พฺรหา ฯ ๒ ม. นนฺทารามวเน ฯ ๓ ม. มญฺชุนาภินิกูชหํ ฯ ๔ ยุ. #ททามิ ฯ ๕ ม. วคฺคุนา ฯ ยุ. ธํสนา ฯ ๖ ม. นีฬํ ฯ ๗ ยุ. ทุฏฺฐมานสา ฯ