ตทา วิปุลเปเมน อุปาสิตฺวา ชินตฺรชํ

ตโต จุโต คโต สคฺคํ ปวาโส สฆรํ ยถา ฯ

สคฺคา จุโต มนุสฺเสสุ นิพฺพตฺโต ปุญฺญกมฺมุนา

อคารํ ฉฑฺฑยิตฺวาน ปพฺพชึ พหุโส อหํ ฯ

สมโณ ตาปโส ทิโช ๑ ปริพฺพาโช ตเถวหํ

หุตฺวา วสึ อรญฺญมฺหิ อเนกสตโย ๒ อหํ ฯ

ปจฺฉิเม จ ภเว ทานิ รมฺเม กาปิลวตฺถเว

วจฺฉโคตฺโต ทิโช ตสฺส ชายาย อหโมกฺกมึ ฯ

มาตุ เม โทหโฬ อาสิ ติโรกุจฺฉิคตสฺส เม

ชายมานสมีปมฺหิ วนวาสาย นิจฺฉโย ฯ

ตโต เม อชนิ มาตา รมณีเย วนนฺตเร

คพฺภโต นิกฺขมนฺตํ มํ กาสาเยน ปฏิคฺคหุํ ฯ

ตโต กุมาโร สิทฺธตฺโถ ชาโต สกฺยกุลทฺธโช

ตสฺส มิตฺโต ปิโย อาสึ สํวิสฺสฏฺโฐ สุมานิโย ๓ ฯ

สตฺตสาเรหิ นิกฺขนฺเต ๔ โอหาย วิปุลํ ยสํ

อหํปิ ปพฺพชิตฺวาน หิมวนฺตํ อุปาคมึ ฯ

วนาลยํ ภาวนิยํ กสฺสปํ ธุตวาทกํ ๕

ทิสฺวา สุตฺวา ชินุปฺปาทํ อุเปสึ นรสารถึ ฯ

โส เม ธมฺมํ อเทเสสิ สพฺพตฺถํ สมฺปกาสยํ

ตโตหํ ปพฺพชิตฺวาน วนเมว ปุโนกฺกมํ ๖ ฯ #๑ ม. ยุ. วิปฺโป ฯ ๒ ม. ยุ. อเนกสตโส ฯ ๓ ยุ. สุมานิโค ฯ #๔ ม. นิกฺขนฺโต ฯ ๕ ม. ธุตวาทิกํ ฯ ๖ ม. ปุนาคมํ ฯ ยุ. ปุนาคมึ ฯ