สฺวาคตํ วต เม อาสิ พุทฺธเสฏฺฐสฺส ๑ สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ สุเมธา ภิกฺขุนี อิมา คาถาโย อภาสิตฺถาติ ฯ
สุเมธาเถริยา อปทานํ สมตฺตํ ฯ
ทุติยํ เมขลทายิกาเถริยาปทานํ (๒)
[๑๔๒] สิทฺธตฺถสฺส ภควโต ถูปการมกาสหํ ๒
เมขลิกา มยา ทินฺนา นวกมฺมสฺส สตฺถุโน ฯ
นิฏฺฐิเต จ มหาถูเป เมขลํ ปุนทาสหํ
โลกนาถสฺส มุนิโน ปสนฺนา เสหิ ปาณิภิ ฯ
จตุนวุเต อิโต กปฺเป เมขลํ อททึ ตทา ๓
ทุคฺคตึ นาภิชานามิ ถูปการสฺสิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาคีว พนฺธนํ เฉตฺวา วิหรามิ อนาสวา ฯ
สฺวาคตํ วต เม อาสิ พุทฺธเสฏฺฐสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ม. ยุ. มม พุทฺธสฺส... ฯ ๒ ม. ถูปการาปิกา อหุํ ฯ ยุ. ถูปํ การาปิตา อหํ ฯ #๓ ม. ยุ. ยํ เมขลมทํ ตทา ฯ