อิตฺถํ สุทํ เมขลทายิกา ภิกฺขุนี อิมา คาถาโย อภาสิตฺถาติ ฯ
เมขลทายิกาเถริยา อปทานํ สมตฺตํ ฯ
ตติยํ มณฺฑปทายิกาเถริยาปทานํ (๓)
[๑๔๓] โกนาคมนพุทฺธสฺส มณฺฑโป การิโต มยา
ถูปญฺจ ๑ ปวรมทํ พุทฺธสฺส โลกพนฺธุโน ฯ
ยํ ยํ ชนปทํ ยามิ นิคเม ราชธานิโย
สพฺพตฺถ ปูชิตา โหมิ ปุญฺญกมฺมสฺสิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาคีว พนฺธนํ เฉตฺวา วิหรามิ อนาสวา ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ มณฺฑปทายิกา ภิกฺขุนี อิมา คาถาโย อภาสิตฺถาติ ฯ
มณฺฑปทายิกาเถริยา อปทานํ สมตฺตํ ฯ
จตุตฺถํ สงฺกมนทาเถริยาปทานํ ๒ (๔)
[๑๔๔] โกณฺฑญฺญสฺส ๓ ภควโต โลกเชฏฺฐสฺส ตาทิโน
รถิยํ ปฏิปนฺนสฺส ตารยนฺตสฺส ปาณิโน ฯ #๑ ม. ธุวํ ติจีวรํ ทาสึ ฯ ยุ. ธุวญฺจ จีวรมทํ ฯ ๒ ม. สงฺกมนตาเถริยาปทานํ ฯ #๓ ม. วิปสฺสิสฺส ฯ