สุญฺญาคาเร ปชฺฌายนฺตา ๑ ปญฺจทีปา ชลนฺติ เม ฯ
ทิพฺพจกฺขุ วิสุทฺธํ เม สมาธิกุสลา อหํ
อภิญฺญาปารมิปฺปตฺตา ปญฺจทีปานิทํ ผลํ ฯ
สพฺพโวสิตโวสานา กตกิจฺจา อนาสวา
ปญฺจทีปา มหาวีร ปาเท วนฺทามิ จกฺขุมา ฯ
สตสหสฺเส อิโต กปฺเป ยํ ทีปมททึ ตทา
ทุคฺคตึ นาภิชานามิ ปญฺจทีปานิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาคีว พนฺธนํ เฉตฺวา วิหรามิ อนาสวา ฯ
สฺวาคตํ วต เม อาสิ พุทฺธเสฏฺฐสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ ปญฺจทีปิกา ภิกฺขุนี อิมา คาถาโย อภาสิตฺถาติ ฯ
ปญฺจทีปิกาเถริยา อปทานํ สมตฺตํ ฯ
ทสมํ อุทกทายิกาเถริยาปทานํ (๑๐)
[๑๕๐] นคเร พนฺธุมติยา อาสึ ๒ อุทกหาริกา
อุทหาเรน ชีวามิ เตน โปเสมิ ทารเก ฯ
เทยฺยธมฺโม จ เม นตฺถิ ปุญฺญกฺเขตฺเต อนุตฺตเร
โกฏฺฐกํ อุปสงฺกมฺม อุทกํ ปฏฺฐเปสหํ ฯ #๑ ม. วสนฺติยา ฯ ยุ. จ ฌายนฺตา ฯ ๒ ม. อโหสึ อุทหาริกา ฯ