กิเลสา ฌาปิตา มยฺหํ ภวา สพฺเพ สมูหตา
นาคีว พนฺธนํ เฉตฺวา วิหรามิ อนาสวา ฯ
สฺวาคตํ วต เม อาสิ พุทฺธเสฏฺฐสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ เอกุโปสถิกา ภิกฺขุนี อิมา คาถาโย อภาสิตฺถาติ ฯ
เอกุโปสถิกาเถริยา อปทานํ สมตฺตํ ฯ
ทุติยํ สลฬปุปฺผิกาเถริยาปทานํ (๑๒)
[๑๕๒] จนฺทภาคานทีตีเร อโหสึ กินฺนรี ตทา
อถทฺทสํ เทวเทวํ จงฺกมนฺตํ นราสภํ ฯ
โอจินิตฺวา สลฬปุปฺผํ พุทฺธเสฏฺฐสฺสทาสหํ
อุปสิงฺฆิ มหาวีโร สลฬํ เทวคนฺธิกํ ๑ ฯ
ปฏิคฺคเหตฺวา สมฺพุทฺโธ วิปสฺสี โลกนายโก
อุปสิงฺฆิ มหาวีโร เปกฺขมานาย เม ตทา ฯ
อญฺชลึ ปคฺคเหตฺวาน วนฺทิตฺวา ทิปทุตฺตมํ
สกํ จิตฺตํ ปสาเทตฺวา ตโต ปพฺพตมารุหึ ฯ
เอกนวุเต อิโต กปฺเป ยํ ปุปฺผมททึ ตทา
ทุคฺคตึ นาภิชานามิ พุทฺธปูชายิทํ ผลํ ฯ #๑ ยุ. ปุพฺพคนฺธิกํ ฯ