ตญฺจ ลทฺธํ มหาวีร ปณิธานํ มมนฺตยา

อนุกํ วา มหนฺตํ วา ตํ สพฺพํ ปูริตํ ตยา ๑ ฯ

ปรินิพฺพาตุมิจฺฉามิ วิหาเยมํ กเลวรํ

อนุชานาหิ เม วีร ทุกฺขนฺตกร นายก ฯ

จกฺกงฺกุสธชากิณฺเณ ปาเท กมลโกมเล

ปสาเรหิ ปณามนฺเต กริสฺสํ ปุตฺตเปมหํ ๒ ฯ

สุวณฺณราสิสงฺกาสํ สรีรํ กุรุปากฏํ

กตฺวา เทหํ สุทิฏฺฐนฺเต สนฺตํ ๓ คจฺฉามิ นายก ฯ

ทฺวตฺตึสลกฺขณูเปตํ สุปฺปภาลงฺกตํ ตนน

สญฺฉคฺฆนาว ๔ พาลกฺขํ มาตุจฺฉํ ทสฺสยิ ชิโน ฯ

ผุลฺลารวินฺทสงฺกาเส ตรุณาทิจฺจสปฺปเภ

จกฺกงฺกิเต ปาทตเล ตโต ๕ สา สิรสา ปติ ฯ

ปณมามิ นราทิจฺจํ อาทิจฺจกุลเกตุนํ

ปจฺฉิเม สรณํ ๖ มยฺหํ น ตํ ทกฺขามหํ ๗ ปุน ฯ

อิตฺถิโย นาม โลกคฺค สพฺพโทสกรา มตา

ยทิ โกจตฺถิ โทโส เม ขมสฺสุ กรุณากร ฯ

อิตฺถิกานญฺจ ปพฺพชฺชํ ยมหํ ๘ ยาจึ ปุนปฺปุนํ

ตตฺถ เจ อตฺถิ โทโส เม ตํ ขมสฺสุ นราสภ ฯ

มยา ภิกฺขุนิโย วีร ตวานุญฺญาย สาสิตา

ตตฺถ เจ อตฺถิ ทุนฺนีตํ ตํ ขมสฺสุ ขมาธิติ ๙ ฯ #๑ ม. ยุ. มยา ฯ ๒ ม. ปุตฺตอุตฺตเม ฯ ยุ. ปุตฺตเปมสา ฯ ๓ ม. ยุ. สนฺตึ ฯ #๔ ยุ. สญฺฌาฆนาว ฯ ๕ ยุ. ปาเท ฯ ๖ ม. ยุ. มรเณ ฯ ๗ ม. อิกฺขามหํ ปุโน ฯ #๘ ม. ตํตํ ฯ ๙ ม. ขมาธิป ฯ