อิทฺธิยา ๑ จ วสี อาสิ ทิพฺพาย โสตธาตุยา

เจโตปริยญาณสฺส วสี อาสิ จ โคตมี ฯ

ปุพฺเพนิวาสมญฺญาสิ ทิพฺพจกฺขุ วิโสธิตํ

สพฺพาสวา ปริกฺขีณา นตฺถิ ทานิ ๒ ปุนพฺภโว ฯ

อตฺถธมฺมนิรุตฺตีสุ ปฏิภาเณ ตเถว จ

ปริสุทฺธํ อหุ ญาณํ ตสฺมา โสจนิยา น สา ฯ

อโยฆนหตสฺเสว ชลโต ชาตเวทโส ๓

อนุปุพฺพูปสนฺตสฺส ยถา น ญายเต คติ ฯ

เอวํ สมฺมาวิมุตฺตานํ กามพนฺโธฆตารินํ

ปญฺญาปาตุํ คติ นตฺถิ ปตฺตานํ อจลํ ปทํ ๔ ฯ

อตฺตทีปา ตโต โหถ สติปฏฺฐานโคจรา

ภาเวตฺวา สตฺตโพชฺฌงฺคํ ๕ ทุกฺขสฺสนฺตํ กริสฺสถาติ ฯ

อิตฺถํ สุทํ อายสฺมา มหาปชาปติโคตมี ภิกฺขุนี อิมา คาถาโย

อภาสิตฺถาติ ฯ

มหาปชาปติโคตมีเถริยา อปทานํ สมตฺตํ ฯ

อฏฺฐมํ เขมาเถริยาปทานํ (๑๘)

[๑๕๘] ปทุมุตฺตโร นาม ชิโน สพฺพธมฺเมสุ จกฺขุมา

อิโต สตสหสฺสมฺหิ กปฺเป อุปฺปชฺชิ นายโก ฯ #๑ ม. อิทฺธีสุ จ ฯ ๒ ม. ยุ. ตสฺสา ฯ ๓ ม. ชาตเวทสฺส ฯ ๔ ม. ยุ. สุขํ ฯ #๕ ม. ยุ. สตฺตโพชฺฌงฺเค ฯ