จตุตฺโถ ขตฺติยกญฺญาวคฺโค

ปฐมํ อฏฺฐารสสหสฺสขตฺติยกญฺญาเถรีนมปทานํ (๓๑)

[๑๗๑] ภวา สพฺเพ ปริกฺขีณา ภวสนฺธิ ๑ วิโมจิตา

สพฺพาสวา จ โน นตฺถิ อาโรเจม มหามุเน ฯ

ปริกมฺมญฺจ ๒ กุสลํ ยงฺกิญฺจิ สาธุ ๓ ปตฺถิตํ

ปริโภคํ ๔ มยา ทินฺนํ ตุยฺหตฺถาย มหามุเน ฯ

พุทฺธปจฺเจกพุทฺธานํ สาวกานญฺจ ปตฺถิตํ

ปริโภคํ มยา ทินฺนํ ตุยฺหตฺถาย มหามุเน ฯ

อุจฺจานีจํ มยา กมฺมํ ภิกฺขูนํ สาธุ ปตฺถิตํ

อุจฺจากุลปริกฺกมฺมํ กตเมฺหหิ ๕ มหามุเน ฯ

เตเนว สุกฺกมูเลน โจทิตา กมฺมสมฺปทา

มานุสิกมติกฺกนฺตา ชายึสุ ขตฺติเย กุเล ฯ

อุปจิเต ๖ กเต กมฺเม ชาติยา จาปิ ๗ เอกโต

ปจฺฉิเม เอกโต ชาตา ขตฺติยา กุลสมฺภวา ฯ

รูปวตี โภควตี ลาภสกฺการปูชิตา

อนฺเตปุเร มหาวีร เทวานํ อิว นนฺทเน ฯ

นิพฺพินฺทิตฺวา อคารมฺหา ปพฺพชิมฺหานคาริยํ

กติปาหํ อุปาทาย สพฺพา ปตฺตามฺห นิพฺพุตึ ฯ #๑ ม. ภวา สนฺติ ... ฯ ๒ ม. ยุ. ปุริมํ กุสลํ กมฺมํ ฯ ๓ โป. ยุ. สพฺพํ ฯ #๔ ม. ปริโภคมยํ ฯ ยุ. ปริโภคํ อยํ ฯ อิโต ปรํ อีทิสเมว ฯ ๕ ม. กตเมตํ ฯ #๖ ม. อุปฺปตฺเตจ ฯ ยุ. อุปฺปตฺเตว ฯ ๗ ม. วาปิ ฯ