ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ สิงฺคาลมาตา ภิกฺขุนี อิมา คาถาโย อภาสิตฺถาติ ฯ
สิงฺคาลมาตาเถริยา อปทานํ สมตฺตํ ฯ
ปญฺจมํ สุกฺกาเถริยาปทานํ (๓๕)
[๑๗๕] เอกนวุเต อิโต กปฺเป วิปสฺสี นาม นายโก
อุปฺปชฺชิ จารุนยโน สพฺพธมฺมวิปสฺสโก ฯ
ตทาหํ พนฺธุมติยํ ชาตา อญฺญตเร กุเล
ธมฺมํ สุตฺวาน มุนิโน ปพฺพชึ อนคาริยํ ฯ
พหุสฺสุตา ธมฺมธรา ปฏิภาณวตี ตถา
วิจิตฺตกถิกา จาปิ ชินสาสนการิกา ฯ
ตทา ธมฺมกถํ กตฺวา หิตาย ชนตํ สทา ๑
ตโต จุตาหํ ตุสิตํ อุปปนฺนา ยสสฺสินี ฯ
เอกตฺตึเส อิโต กปฺเป สิขี วิย สิขี ชิโน
ตปนฺโต ยสสา โลกํ ๒ อุปฺปชฺชิ วทตํ วโร ฯ
ตทาปิ ปพฺพชิตฺวาน พุทฺธสาสนโกวิทา
โชเตตฺวา ชินวากฺยานิ ตโตปิ ติทิวงฺคตา ฯ
เอกตฺตึเส ๓ อิโต กปฺเป เวสฺสภู นาม นายโก
อุปฺปชฺชิตฺถ มหายานี ตทาปิจ ตเถวหํ ฯ #๑ ม. พหุํ ฯ ยุ. ...ชนสํสรึ ฯ ๒ ม. โลเก ฯ ๓ ม. ยุ. เอกตฺตึเสว กปฺปมฺหิ ฯ