สพฺพาสวปริกฺขีณา นตฺถิ ทานิ ปุนพฺภโว ฯ
อตฺถธมฺมนิรุตฺตีสุ ปฏิภาเณ ตเถว จ
ญาณํ มม มหาวีร อุปฺปนฺนํ ตว สนฺติเก ฯ
กิเลสา ฌาปิตา มยฺหํ ภวา สพฺเพ สมูหตา
นาคีว พนฺธนํ เฉตฺวา วิหรามิ อนาสวา ฯ
สฺวาคตํ วต เม อาสิ พุทฺธเสฏฺฐสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อภิรูปนนฺทา ภิกฺขุนี อิมา คาถาโย อภาสิตฺถาติ ฯ
อภิรูปนนฺทาเถริยา อปทานํ สมตฺตํ ฯ
สตฺตมํ อฑฺฒกาสีเถริยาปทานํ (๓๗)
[๑๗๗] อิมมฺหิ ภทฺทเก กปฺเป พฺรหฺมพนฺธุ มหายโส
กสฺสโป นาม นาเมน อุปฺปชฺชิ วทตํ วโร ฯ
ตทาหํ ปพฺพชิตฺวาน ตสฺส พุทฺธสฺส สาสเน
สํวุตา ปาฏิโมกฺขมฺหิ อินฺทฺริเยสุ จ ปญฺจสุ ฯ
มตฺตญฺญู นีจอาสเน ยุตฺตา ชาคริเยปิจ ๑
วสนฺตี ยุตฺตโยคาหํ ๒ ภิกฺขุนึ วิคตาสวํ ฯ
อกฺโกสึ ทุฏฺฐจิตฺตาหํ คณิเกติ สกึ ตทา
เตเนว ปาปกมฺเมน นิรยมฺหิ อปจฺจิสํ ฯ #๑ ยุ. ชาคริเยสุจ ฯ ๒ โป. ธุตฺตโยคาหํ ฯ