สฺวาคตํ วต เม อาสิ พุทฺธเสฏฺฐสฺส สนฺติเก

ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อฑฺฒกาสิกา ภิกฺขุนี อิมา คาถาโย อภาสิตฺถาติ ฯ

อฑฺฒกาสีเถริยา อปทานํ สมตฺตํ ฯ

อฏฺฐมํ ปุณฺณิกาเถริยาปทานํ (๓๘)

[๑๗๘] วิปสฺสิโน ภควโต สิขิโน เวสฺสภุสฺส จ

กกุสนฺธสฺส มุนิโน โกนาคมนตาทิโน ฯ

กสฺสปสฺส จ พุทฺธสฺส ปพฺพชิตฺวาน สาสเน

ภิกฺขุนี สีลสมฺปนฺนา นิปกา สํวุตินฺทฺริยา ฯ

พหุสฺสุตา ธมฺมธรา ธมฺมตฺถปริปุจฺฉิตา ๑

อุคฺคเหตฺวา ๒ จ ธมฺมานํ โสตา ปยิรุปาสิกา ๓ ฯ

เทเสนฺตี ชนมชฺเฌหํ อโหสึ ชินสาสนํ ๔

พาหุสจฺเจน เตนาหํ เปสลา อติมญฺญิสํ ฯ

ปจฺฉิเม จ ภเว ทานิ สาวตฺถิยํ ปุรุตฺตเม

อนาถปิณฺฑิโน เคเห ชาตาหํ กุมฺภทาสิยา ฯ

คตา อุทกหาริยํ โสตฺถิยํ ทิชมทฺทสํ

สีตฏฺฏํ โตยมชฺฌมฺหิ ตํ ทิสฺวา อิทมพฺรวึ ฯ #๑ ม. ...ปฏิปุจฺฉิกา ฯ ยุ. อตฺถตฺถปริปุจฺฉิกา ฯ ๒ ม. ยุ. อุคฺคเหตา ฯ #๓ โป. ...สิตา ฯ ๔ ม. ชินสาสเน ฯ