สุตฺตนฺตปิฏเก ขุทฺทกนิกายสฺส

พุทฺธวํโส

_______________

นโม ตสฺส ภควโต อรหโต สมฺมาสมฺพุทฺธสฺส ฯ

รตนจงฺกมนกณฺโฑ

[๑] พฺรหฺมา จ โลกาธิปตี สมหฺปติ ๑

กตญฺชลี อนธิวรํ อยาจถ

สนฺตีธ สตฺตา อปฺปรชกฺขชาติกา

เทเสหิ ธมฺมํ อนุกมฺปิมํ ปชนฺติ ฯ

๒ [ภควา โลกาธิปตี นรุตฺตโม

กตญฺชลีพฺรหฺมคเณหิ ยาจิโต

สนฺตีธ ธีราปฺปรชกฺขชาติกา

เทเสตุ ธมฺมํ อนุกมฺปิมํ ปชํ ฯ

เทเสตุ สุคโต ธมฺมํ เทเสตุ อมตํปทํ

โลกานมนุกมฺปาย ธมฺมํ เทเสตุ นายก] ฯ

สมฺปนฺนวิชฺชาจรณสฺส ตาทิโน

ชุตินฺธรสฺสนฺติมเทหธาริโน

ตถาคตสฺสปฺปฏิปุคฺคลสฺส

อุปฺปชฺชิ การุญฺญตา สพฺพสตฺเต ฯ

#๑ ม. สหมฺปตี ฯ ๒ ม. ยุ. อิเม ปาฐา นตฺถิ ฯ