ทีปงฺกโร โลกวิทู อาหุตีนํ ปฏิคฺคโห

มม กมฺมํ ปกิตฺเตตฺวา ทกฺขิณปาทมุทฺธริ ฯ

เย ตตฺถ อาสุํ ชินปุตฺตา สพฺเพ ปทกฺขิณมกํสุ มํ

เทวา มนุสฺสา อสุรา ยกฺขา ๑ อภิวาเทตฺวาน ปกฺกมม ฯ

ทสฺสนํ เม อติกฺกนฺเต สสงฺเฆ โลกนายเก

สยนา วุฏฺฐหิตฺวาน ปลฺลงฺกํ อาภุชึ ตทา ฯ

สุเขน สุขิโต โหมิ ปาโมชฺเชน ปโมทิโต

ปีติยา จ อภิสฺสนฺโน ปลฺลงฺกํ อาภุชึ ตทา ฯ

ปลฺลงฺเกน นิสีทิตฺวา เอวํ จินฺเตสิหํ ตทา

วสีภูโต อหํ ฌาเน อภิญฺญาปารมิงฺคโต ๒ ฯ

สหสฺสิยมฺหิ โลกมฺหิ อิสโย นตฺถิ เม สมา

อสโม อิทฺธิธมฺเมสุ อลภึ อีทิสํ สุขํ ฯ

ปลฺลงฺกาภุชเน มยฺหํ ทสสหสฺสาธิวาสิโน

มหานาทํ ปวตฺเตสุํ ธุวํ พุทฺโธ ภวิสฺสสิ ฯ

ยา ปุพฺเพ โพธิสตฺตานํ ปลฺลงฺกวรมาภุเช

นิมิตฺตานิ ปทิสฺสนฺติ ตานิ อชฺช ปทิสฺสเร ฯ

สีตํ พฺยาปคตํ ๓ โหติ อุณฺหญฺจ อุปสมฺมติ

ตานิ อชฺช ปทิสฺสนฺติ ธุวํ พุทฺโธ ภวิสฺสสิ ฯ

ทสสหสฺสี โลกธาตุ นิสฺสทฺทา โหติ นิรากุลา

ตานิ อชฺช ปทิสฺสนฺติ ธุวํ พุทฺโธ ภวิสฺสสิ ฯ #๑ ม. ยุ. จ ฯ ๒ ม. ยุ. อภิญฺญาสุ ฯ ๓ ม. พฺยปคตํ ฯ