นวุติวสฺสสหสฺสานิ อายุ วิชฺชติ ตาวเท

ตาวตา ติฏฺฐมาโน โส ตาเรสิ ชนตํ พหุํ ฯ

โอวาทํ อนุสิฏฺฐิญฺจ ทตฺวาน เสสเก ชเน

หุตาสโนว ตาเปตฺวา นิพฺพุโต โส สสาวโก ฯ

โส จ พุทฺโธ อสมสโม เต ๑ จ สาวกา พลปฺปตฺตาI

สพฺพํ สมนฺตรหิตํ นนุ ริตฺตา สพฺพสงฺขาราติ ฯ

โสภิโต วรสมฺพุทฺโธ สีหารามมฺหิ นิพฺพุโต

ธาตุวิตฺถาริกํ อาสิ เตสุ เตสุ ปเทสโตติ ฯ

โสภิตพุทฺธวํโส ฉฏฺโฐ ฯ

สตฺตโม อโนมทสฺสิพุทฺธวํโส

[๘] โสภิตสฺส อปเรน สมฺพุทฺโธ ทิปทุตฺตโม

อโนมทสฺสี อมิตยโส เตชสี ทุรติกฺกโม ฯ

โส เฉตฺวา พนฺธนํ สพฺพํ วิทฺธํเสตฺวา ตโย ภเว

อนิวตฺติคมนํ มคฺคํ เทเสสิ เทวมานุเส ฯ

สาคโรว อสงฺโขพฺโภ ปพฺพโตว ทุราสโท

อากาโสว อนนฺโต โส สาลราชาว ผุลฺลิโต ฯ

ทสฺสเนนปิ ตํ พุทฺธํ โตสิตา โหนฺติ ปาณิโน

พฺยาหรนฺตํ คิรํ สุตฺวา อมตํ ปาปุณนฺติ เต ฯ #๑ ม. เตปิ ฯ ยุ. เตปิ จ ฯ