พุทฺธปฺปกิณฺณกกณฺโฑ

[๒๗] อปริเมยฺเย อิโต กปฺเป จตุโร อาสุํ วินายกา

ตณฺหงฺกโร เมธงฺกโร อโถปิ สรณงฺกโร

ทีปงฺกโร จ สมฺพุทฺโธ เอกกปฺปมฺหิ เต ชินา ฯ

ทีปงฺกรสฺส อปเรน โกณฺฑญฺโญ ๑ นาม นายโก

เอโกว เอกกปฺปมฺหิ ตาเรสิ ชนตํ พหุํ ฯ

ทีปงฺกรสฺส ภควโต โกณฺฑญฺญสฺส จ สตฺถุโน

เอเตสํ อนฺตรา กปฺปา คณนาโต อสงฺเขยฺยา ฯ

โกณฺฑญฺญสฺส อปเรน มงฺคโล นาม นายโก

เตสํปิ อนฺตรา กปฺปา คณนาโต อสงฺเขยฺยา ๒ ฯ

มงฺคโล จ สุมโน จ เรวโต โสภิโต มุนิ

เตปิ พุทฺธา เอกกปฺเป จกฺขุมนฺโต ปภงฺกรา ฯ

โสภิตสฺส อปเรน อโนมทสฺสี มหามุนิ ๓

เตสํปิ อนฺตรา กปฺปา คณนาโต อสงฺเขยฺยา ฯ

อโนมทสฺสี ปทุโม นารโท จาปิ นายโก

เตปิ พุทฺธา เอกกปฺเป ตมนฺตกรณา ๔ มุนี ฯ

นารทสฺส อปเรน ปทุมุตฺตโร นาม นายโก

เอกกปฺปมฺหิ อุปฺปนฺโน ตาเรสิ ชนตํ พหุํ ฯ

นารทสฺส ภควโต ปทุมุตฺตรสฺส สตฺถุโน

เตสํปิ อนฺตรา กปฺปา คณนาโต อสงฺเขยฺยา ฯ #๑ ยุ. โกณฺฑญฺญสฺส นาม ฯ ๒ ม. อสงฺขิยา ฯ อิโต ปรํ อีทิสเมว ฯ #๓ ม. ยุ. มหายโส ฯ ๔ ม. ยุ. ...การกา ฯ