ทุติยํ ทิวสํ ตติยํปิ อุปคจฺฉิ มมนฺติเก

อกมฺปิโต อโนลคฺโค เอวเมวมทาสหํ ฯ

น เม ตปฺปจฺจยา อตฺถิ สรีรสฺมึ วิวณฺณิยํ

ปีติสุเขน รติยา วีตินาเมมิ ตํ ทิวํ ฯ

ยทิ มาสํปิ ทฺวิมาสํ ทกฺขิเณยฺยํ วรํ ลเภ

อกมฺปิโต อโนลีโน ทเทยฺยํ ทานมุตฺตมํ ฯ

น ตสฺส ทานํ ททมาโน ยสํ ลาภญฺจ ปตฺถยึ

สพฺพญฺญุตํ ปตฺถยาโน ตานิ กมฺมานิ อาจรินฺติ ฯ

อกิตฺติจริยํ ปฐมํ ฯ

ทุติยํ สงฺขพฺราหฺมณจริยํ

[๒] ปุนาปรํ ยทา โหมิ พฺราหฺมโณ สงฺขสวฺหโย

มหาสมุทฺทํ ตริตุกาโม อุปคจฺฉามิ ปฏฺฏนํ ฯ

ตตฺถทฺทสามิ ๑ ปฏิปเถ สยมฺภุํ อปราชิตํ

กนฺตารมทฺธานํ ปฏิปนฺนํ ตตฺตาย กฐินภูมิยา ฯ

ตมหํ ปฏิปเถ ทิสฺวา อิมมตฺถํ วิจินฺตยึ

อิมํ ๒ เขตฺตํ อนุปฺปตฺตํ ปุญฺญกามสฺส ชนฺตุโน ฯ

ยถาปิ กสฺสโก ปุริโส เขตฺตํ ทิสฺวา มหารามํ ๓

น ตตฺถ พีชํ โรเปติ น โส ธญฺเญน อตฺถิโก ฯ #๑ ม. ตตฺถทฺทสํ ฯ ยุ. ตตฺถ อทสฺสึ ฯ ๒ ม. ยุ. อิทํ ฯ ๓ ม. ยุ. มหาคมํ ฯ