เอวเมวาหํ ปุญฺญกาโม ทิสฺวา เขตฺตํ วรุตฺตมํ

ยทิ [๑] การํ น กโรมิ นาหํ ปุญฺเญน อตฺถิโก ฯ

ยถา อมจฺโจ มุทฺทกาโม ๒ รญฺโญ อนฺเตปุเร ชเน

น เทติ เตสํ ธนธญฺญํ มุทฺทโต ๓ ปริหายติ ฯ

เอวเมวาหํ ปุญฺญกาโม วิปุลํ ทิสฺวาน ทกฺขิณํ

ยทิ ตตฺถ ๔ ทานํ น ทามิ ปริหายิสฺสามิ ปุญฺญโต ฯ

เอวาหํ จินฺตยิตฺวาน โอโรหิตฺวา อุปาหนา

ตสฺส ปาทานิ วนฺทิตฺวา อทาสึ ฉตฺตุปาหนํ ฯ

เตนาหํ ๕ สตคุณโต สุขุมาโล สุเขธิโต

อปิจ ทานํ ปริปูเรนฺโต เอวํ ตสฺส อทาสหนฺติ ฯ

สงฺขพฺราหฺมณจริยํ ทุติยํ ฯ

ตติยํ กุรุธมฺมจริยํ ๖

[๓] ปุนาปรํ ยทา โหมิ อินฺทปตฺเถ ปุรุตฺตเม

ราชา ธนญฺชโย นาม กุสเลหิ ทสหุปาคโต ฯ

กาลิงฺครฏฺฐวิสยา พฺราหฺมณา อุปคจฺฉุ มํ

อยาจุํ มํ หตฺถินาคํ ธญฺญํ มงฺคลสมฺมตํ ฯ

อวุฏฺฐิโก ชนปโท ทุพฺภิกฺโข ฉาตโก มหา

ททาหิ ปวรํ นาคํ นีลํ อญฺชนสวฺหยํ ฯ #๑ ม. ยุ. ตตฺถ ฯ ๒ ม. ยุ. มุทฺทิกาโม ฯ ๓ ม. ยุ. มุทฺทิโต ฯ ๔ ม. ยุ. ... ตสฺส #ทานํ น ททามิ ฯ ๕ ม. ยุ. เตเนวาหํ ฯ ๖ ม. กุรุราชจริยํ ฯ