น เม ยาจกมนุปฺปตฺเต ปฏิกฺเขโป อนุจฺฉโว

มา เม ภิชฺชิ สมาทานํ ทสฺสามิ วิปุลํ คชํ ฯ

นาคํ คเหตฺวา โสณฺฑาย ภิงฺคาเร รตนามเย

ชลํ หตฺเถ อากิริตฺวา พฺราหฺมณานํ อทํ คชํ ฯ

ตสฺส ๑ นาเค ปทินฺนมฺหิ อมจฺจา เอตทพฺรวว

กึ นุ ตุยฺหํ วรํ นาคํ ยาจกานํ จ ทสฺสสิ ฯ

ธญฺญํ มงฺคลสมฺปนฺนํ สงฺคามวิชยุตฺตมํ

ตสฺส ๒ นาเค ปทินฺนมฺหิ กินฺเต รชฺชํ กริสฺสติ ฯ

รชฺชมฺปิ เม ทเท สพฺพํ สรีรํ ทชฺชมตฺตโน

สพฺพญฺญุตํ ปิยํ มยฺหํ ตสฺมา นาคํ อทาสหนฺติ ฯ

กุรุธมฺมจริยํ ตติยํ ฯ

จตุตฺถํ มหาสุทสฺสนจริยํ

[๔] กุสาวติมฺหิ นคเร ยทา อาสึ มหีปติ

มหาสุทสฺสโน นาม จกฺกวตฺติ มหพฺพโล ฯ

ตตฺถาหํ ทิวเส ติกฺขตฺตุํ โฆสาเปมิ ตหึ ตหึ

โก กึ อิจฺฉติ ปตฺเถติ กสฺส กึ ทิยฺยตู ธนํ ฯ

โก ฉาตโก โก ตสิโต โก มาลํ โก วิเลปนํ

นานารตฺตานิ วตฺถานิ โก นคฺโค ปริทหิสฺสติ

โก ปเถ ฉตฺตมาเทติ โกปาหนา มุทู สุภา ฯ #๑-๒ ยุ. ตสฺมึ ฯ