ตทาหํ ยชนา มุตฺโต นิกฺขนฺโต ยญฺญวา ๑ ตโต
สํเวคํ ชนยิตฺวาน มหาทานํ ปวตฺตยึ ฯ
นาหํ ปิวามิ ขาทามิ นปิ ภุญฺชามิ โภชนํ
ทกฺขิเณยฺเย ๒ อทตฺวาน อปิ ฉปฺปญฺจ รตฺติโย ฯ
ยถาปิ วาณิโช นาม กตฺวาน ภณฺฑสญฺจยํ
ยตฺถ ลาโภ มหา โหติ ตตฺถ ๓ ตํ หรติ ภณฺฑกํ ฯ
ตเถว สกภุตฺตํปิ ๓ ปเร ทินฺนํ มหปฺผลํ
ตสฺมา ปรสฺส ทาตพฺพํ สตภาโค ภวิสฺสติ ฯ
เอตมตฺถวสํ ญตฺวา เทมิ ทานํ ภวาภเว
น ปฏิกฺกมามิ ทานโต สมฺโพธิมนุปตฺติยาติ ฯ
จนฺทกุมารจริยํ สตฺตมํ ฯ
อฏฺฐมํ สิวิราชจริยํ
[๘] อริฏฺฐสวฺหเย นคเร สิวิ นามาสิ ขตฺติโย
นิสชฺช ปาสาทวเร เอวํ จินฺเตสหํ ตทา ฯ
ยงฺกิญฺจิ มานุสํ ทานํ อทินฺนํ เม น วิชฺชติ
โยปิ ยาเจยฺย มํ จกฺขุํ ทเทยฺยํ อวิกมฺปิโต ฯ
มม สงฺกปฺปมญฺญาย สกฺโก เทวานมิสฺสโร
นิสินฺโน เทวปริสาย อิทํ วจนมพฺรวิ ฯ #๑ ม. ยญฺญวาฏโต ฯ ยุ. ยญฺญวาฏโก ฯ ๒ ยุ. ทกฺขิเณยฺยํ ฯ ๓ ยุ. ยตฺถาหรติ #ภณฺฑกํ ฯ ๓ ม. ยุ. สกภุตฺตาปิ ฯ