อปิจาหํ สีลรกฺขาย สีลปารมิปูริยา
น กโรมิ จิตฺเต อญฺญถตฺตํ ปกฺขิปนฺตํ มมาฬฺหเก ๑ ฯ
ยทิ เต มํ ตตฺถ โกเฏยฺยุํ ผรสูหิ โตมเรหิ จ
เนว เตสํ ปกุปฺเปยฺยํ สีลขณฺฑภยา มมาติ ฯ
สีลวนาคจริยํ ๒ ปฐมํ ฯ
ทุติยํ ภูริทตฺตจริยํ
[๑๒] ปุนาปรํ ยทา โหมิ ภูริทตฺโต มหิทฺธิโก
วิรูปกฺเขน มหารญฺญา เทวโลกมคจฺฉหํ ฯ
ตตฺถ ปสฺสิตฺวาหํ เทเว เอกนฺตํ สุขสมปฺปิเต
ตํ สคฺคํ คมนตฺถาย สีลพฺพตํ สมาทยึ ฯ
สรีรกิจฺจํ กตฺวาน ภุตฺวา ยาปนมตฺตกํ
จตุโร องฺเค อธิฏฺฐาย เสมิ วมฺมิกมุทฺธนิ ฯ
ฉวิยา จมฺเมน มํเสน นฺหารูหิ อฏฺฐิเกหิ วา
ยสฺส เอเตน กรณียํ ทินฺนํเยว หราตุ โส ฯ
สํสิโต อกตญฺญุนา อาลมฺพาโน มมคฺคหิ
เปฬาย ปกฺขิปิตฺวาน กีเฬติ มํ ตหึ ตหึ ฯ
เปฬาย ปกฺขิปนฺเตปิ มํ มทฺทนฺเตปิ ๓ ปาณินา
อาลมฺพาเน น กุปฺปามิ สีลขณฺฑภยา มม ฯ #๑ ม. ยุ. มมาฬเก ฯ ๒ ม. มาตุโปสกจริยํ ฯ ๓ ม. ยุ. สมฺมทฺทนฺเตปิ ปาณินา ฯ