มมํ อุปทฺทุตํ ทิสฺวา ยกฺโข มํ อิทมพฺรวิ

นาเสเหตํ ฉวํ ปาปํ สงฺเคหิ จ ขุเรหิ จ ฯ

เอวํ วุตฺเต ตทา ยกฺเข อหํ ตํ อิทมพฺรวึ

กึ ตฺวํ มกฺเขสิ กุณเปน ปาเปน อนริเยน มํ ฯ

ยทิหนฺตสฺส ปกุปฺเปยฺยํ ตโต หีนตโร ภเว

สีลญฺจ เม ปภิชฺเชยฺย วิญฺญู จ ครเหยฺยุ มํ ฯ

หิฬิตา ชีวิตา วาปิ ปริสุทฺเธน มตํ วรํ

กฺยาหํ ชีวิตเหตูปิ กาหามิ ปรเหธนํ ฯ

[๑]

หีนมชฺฌิมอุกฺกฏฺเฐ สหนฺโต อวมานิตํ

เอวํ ลภติ สปฺปญฺโญ มนสา ยถา ปตฺถิตนฺติ ฯ

มหิสราชจริยํ ปญฺจมํ ฯ

ฉฏฺฐํ รุรุมิคจริยํ

[๑๖] ปุนาปรํ ยทา โหมิ สุตตฺตกนกสนฺนิโภ

มิคราชา รุรุ นาม ปรมสีลสมาหิโต ฯ

รมฺเม ปเทเส รมฺมณีเย วิวิตฺเต อมนุสฺสเก

ตตฺถ วาสํ อุปคญฺฉึ คงฺคากูเล มโนรเม ฯ

อถ อุปริ คงฺคาย ธนิเกหิ ปริปีฬิโต

ปุริโส คงฺคาย ปตติ ชีวามิ วา มรามิ วา ฯ #๑ ม. ยุ. น เมวายํ มญฺญมาโน อญฺเญเปวํ กริสฺสติ # เตว ตสฺส วธิสฺสนฺติ สา เม มุตฺติ ภวิสฺสติ ฯ