อจฺฉา มยุรทีปี จ กรวิกา จ สาลิกา

กุชฺชนฺติ สพฺพทา เอเต โสภยนฺตา มมสฺสมํ ฯ

โกกิลา มญฺชุภาณี จ หํสา จ มธุรสฺสรา

อภิกุชฺชนฺติ เต ตตฺถ โสภยนฺตา มมสฺสมํ ฯ

สีหา พฺยคฺฆา วราหา จ พกา โกกตรจฺฉโย ๑

คิริทุคฺคมฺหิ ๒ นาเทนฺติ โสภยนฺตา มมสฺสมํ ฯ

เอณิมิคา จ สรภา เภรณฺฑา สูกรา พหู

คิริทุคฺคมฺหิ นาเทนฺติ โสภยนฺตา มมสฺสมํ ฯ

อุทฺทาลกา จ จมฺปกา ปาฏลี สินฺทุวาริกา

อธิมุตฺตา ๓ อโสกา จ โสภยนฺตา มมสฺสมํ ฯ

องฺโกลา ยูถิกา เจว สตฺตปณฺณา ๔ พิมฺพิชาลิกา

กณิกา กณิการา จ ปุปฺผนฺติ มม อสฺสเม ๕ ฯ

นาคา สาลา จ สลฬา ปุณฺฑรีเกตฺถ ปุปฺผิตา

ทิพฺพา คนฺธา สมฺปวนฺตา โสภนฺติ มม อสฺสเม ฯ

อสฏฺฐา ๖ อสนา เจตฺถ มหานามา จ ปุปฺผิตา

สาลา จ กงฺคุปุปฺผา จ โสภนฺติ มม อสฺสเม ฯ

อมฺพา ชมฺพู จ ติลกา นิปา ๗ จ สาลกลฺยาณี

ทิพฺพา คนฺธา สมฺปวนฺตา โสภยนฺติ มมสฺสมํ ฯ

อโสกา จ กปิฏฺฐา จ ภคินิมาลา ๘ จ ปุปฺผิตา

ทิพฺพา คนฺธา สมฺปวนฺตา โสภยนฺติ มมสฺสมํ ฯ #๑ ม. อจฺฉโกกตรจฺฉกา ฯ ๒ ยุ. คิริทุคฺคํปิ ฯ ๓ ม. ยุ. อติมุตฺตา ฯ อิโต ปรํ #อีทิสเมว ฯ ๔ ม. ยุ. สตฺตสี ฯ ๕ ม. โสภยนฺตา มมสฺสมํ ฯ ๖ ม. ยุ. อชฺชุนา ฯ #๗ ม. นิมฺพา ฯ ๘ ม. คิริมาเลตฺถ ปุปฺผิตา ฯ ยุ. ภคินิมาเลตฺถ ฯ