ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา มิลกฺขุผลทายโก เถโร อิมา คาถาโย อภาสิตฺถาติ ฯ
มิลกฺขุผลทายกตฺเถรสฺส อปทานํ สมตฺตํ ฯ
นวมํ สยมฺปฏิภาณิยตฺเถราปทานํ (๔๖๙)
[๕๙] กกุธํ วิลสนฺตํว เทวเทวํ นราสภํ
รถิยํ ปฏิปชฺชนฺตํ โก ทิสฺวา นปฺปสีทติ ฯ
ตมนฺธการํ นาเสตฺวา สนฺตาเรตฺวา พหุํ ชนํ
ญาณาโลเกน โชตนฺตํ โก ทิสฺวา นปฺปสีทติ ฯ
วสีสตสหสฺเสหิ นิยฺยนฺตํ โลกนายกํ
อุทฺธรนฺตํ ฬหู สตฺเต โก ทิสฺวา นปฺปสีทติ ฯ
อาหนิตฺวา ธมฺมเภรึ มทฺทนฺตํ ติตฺถิเย คเณ
สีหนาทํ ว นทนฺตํ โก ทิสฺวา นปฺปสีทติ ฯ
ยาวตา พฺรหฺมโลกมฺหา อาคนฺตฺวาน สพฺรหฺมกา
ปุจฺฉนฺติ นิปุเณ ปเญฺห โก ทิสฺวา นปฺปสีทติ ฯ
ยสฺสญฺชลึ กริตฺวาน อาธาวนฺติ ๑ สเทวกา
เตน ปุญฺญํ อนุโภนฺติ โก ทิสฺวา นปฺปสีทติ ฯ
สพฺเพ ชนา สมาคนฺตฺวา สมฺปวาเรนฺติ จกฺขุมํ
น วิกมฺปติ อชฺฌิฏฺโฐ โก ทิสฺวา นปฺปสีทติ ฯ #๑ ม. ยุ. อายาจนฺติ ฯ