ภควา ตมฺหิ สมเย อตฺถทสฺสี มหายโส

จตุสจฺจํ ปกาเสนฺโต เทเสสิ อมตํปทํ ฯ

เสตจฺฉตฺตํ คเหตฺวาน พุทฺธเสฏฺฐสฺส ธารยึ

เอกาหํ ธารยิตฺวาน พุทฺธเสฏฺฐํ อวนฺทิหํ ฯ

อตฺถทสฺสี ตุ ภควา โลกเชฏฺโฐ นราสโภ

ภิกฺขุสงฺเฆ นิสีทิตฺวา อิมา คาถา อภาสถ ฯ

โย เม ฉตฺตมธาเรสิ ปสนฺโน เสหิ ปาณิภิ

ตมหํ กิตฺตยิสฺสามิ สุณาถ มม ภาสโต ฯ

อิมสฺส ชายมานสฺส เทวตฺเต อถ มานุเส

ธาริสฺสนฺติ สทา ฉตฺตํ ฉตฺตทานสฺสิทํ ผลํ ฯ

สตฺตสตฺตติกปฺปานิ เทวโลเก รมิสฺสติ

สหสฺสกฺขตฺตุํ ราชา จ จกฺกวตฺติ ภวิสฺสติ ฯ

สตฺตสตฺตติกฺขตฺตุญฺจ เทวรชฺชํ กริสฺสติ

ปเทสรชฺชํ วิปุลํ คณนาโต อสงฺขยํ

อฏฺฐารเส กปฺปสเต โคตโม สกฺยปุงฺคโว

ตมนฺธการํ นาเสนฺโต อุปชฺชิสฺสติ จกฺขุมา ฯ

ตสฺส ธมฺเมสุ ทายาโท โอรโส ธมฺมนิมฺมิโต

สพฺพาสเว ปริญฺญาย นิพฺพายิสฺสตินาสโว ฯ

ยโต อหํ กมฺมมกํ ๑ ฉตฺตํ พุทฺธสฺส ธารยึ

เอตฺถนฺตเร น ชานามิ เสตจฺฉตฺตํ อธาริตํ ฯ #๑ ยุ. กมฺมกํ ตํ ฯ