อิตฺถํ สุทํ อายสฺมา คิริปุนฺนาคิโย เถโร อิมา คาถาโย อภาสิตฺถาติ ฯ
คิริปุนฺนาคิยตฺเถรสฺส อปทานํ สมตฺตํ ฯ
อฏฺฐมํ วลฺลิการผลทายกตฺเถราปทานํ (๔๗๘)
[๖๘] สุมโน นาม สมฺพุทฺโธ ตกฺกรายํ วสี ตทา
วลฺลิการผลํ คยฺห สยมฺภุสฺส อทาสหํ ฯ
เอกตฺตึเส อิโต กปฺเป ยํ ผลํ อททึ ตทา
ทุคฺคตึ นาภิชานามิ ผลทานสฺสิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา วลฺลิการผลทายโก เถโร อิมา คาถาโย อภาสิตฺถาติ ฯ
วลฺลิการผลทายกตฺเถรสฺส อปทานํ สมตฺตํ ฯ
นวมํ ปานธิทายกตฺเถราปทานํ (๔๗๙)
[๖๙] อโนมทสฺสี ภควา โลกเชฏฺโฐ นราสโภ
ทิวาวิหารา นิกฺขมฺม วีถิมารุยฺหิ จกฺขุมา ฯ