[๑๓๙๔] สขีนํ สาชีวงฺกโร มม สาขสฺส จูภยํ
ตฺวํ โนสิสฺสริยํ ทาตา มนุสฺเสสุ มหคฺคตํ ๑
ตุยฺหมฺหา ลพฺภิตา อิทฺธิ เอตฺถ เม นตฺถิ สํสโย ฯ
[๑๓๙๕] ยถาปิ วีชํ อคฺคิสฺมึ ฑยฺหติ น วิรูหติ
เอวํ กตํ อสปฺปุริเส นสฺสติ น วิรูหติ ฯ
[๑๓๙๖] กตญฺญุมฺหิ จ โปสมฺหิ สีลวนฺเต อริยวุตฺติเน
สุเขตฺเต วิย พีชานิ กตํ ตมฺหิ น นสฺสติ ฯ
[๑๓๙๗] อิมญฺจ ๒ ชมฺมํ เนกติกํ อสปฺปุริสจินฺตกํ
หนนฺตุ สาขํ สตฺตีหิ นาสฺส อิจฺฉามิ ชีวิตํ ฯ
[๑๓๙๘] ขมตสฺส มหาราช ปาณา ทุปฺปฏิอานยา ๓
ขม เทว อสปฺปุริสสฺส นาสฺส อิจฺฉามหํ วธํ ฯ
[๑๓๙๙] นิโคฺรธเมว เสเวยฺย น สาขมุปสํวเส
นิโคฺรธสฺมึ มตํ เสยฺโย ยญฺเจ สาขสฺมิ ชีวิตนฺติ ฯ
นิโคฺรธชาตกํ สตฺตมํ ฯ
___________
๘ ตกฺกลชาตกํ
[๑๔๐๐] น ตกฺกลา สนฺติ น อาลุปานิ ๔
น วิลาลิโย น กลมฺพานิ ตาต
เอโก อรญฺญมฺหิ สุสานมชฺเฌ
กิมตฺถิโก ตาต ขณาสิ กาสุํ ฯ
#๑ ม. มหนฺตตํ ฯ ๒ ม. จสทฺโท นตฺถิ ฯ ๓ ม. นปฏิอานยา ฯ ๔ ม. อาลุวานิ ฯ