น หิ ตฺวํ ลจฺฉสิ จนฺทสุริเย ฯ
[๑๔๓๘] คมนาคมนมฺปิ ทิสฺสติ
วณฺณธาตุ อุภเยตฺถ วีถิโย
เปโต ปน เนว ทิสฺสติ
โก นุ โข กนฺทตํ พาลฺยตโร ฯ
[๑๔๓๙] สจฺจํ โข วเทสิ มาณว
อหเมว กนฺทตํ พาลฺยตโร
จนฺทํ วิย ทารโก รุทํ
เปตํ กาลกตํภิปตฺถเย ๑ ฯ
[๑๔๔๐] อาทิตฺตํ วต มํ สนฺตํ ฆตสิตฺตํว ปาวกํ
วารินา วิย โอสิญฺจิ ๒ สพฺพํ นิพฺพาปเย ทรํ ฯ
[๑๔๔๑] อพฺพุหิ ๓ วต เม สลฺลํ ยมาสิ หทยสฺสิตํ
โย เม โสกปเรตสฺส ปุตฺตโสกํ อปานุทิ ฯ
[๑๔๔๒] โสหํ อพฺพูฬฺหสลฺโลสฺมิ วีตโสโก อนาวิโล
น โสจามิ น โรทามิ ตว สุตฺวาน มาณวาติ ฯ
มฏฺฐกุณฺฑลิชาตกํ เอกาทสมํ ฯ
____________
๑๒ พิลารโกสิยชาตกํ
[๑๔๔๓] อปจนฺตาปิ อิจฺฉนฺติ สนฺโต ลทฺธาน โภชนํ
กิเมว ตฺวํ ปจมาโน ยํ น ทชฺชา น ตํ สมํ ฯ #๑ ม. กาลกตาภิปตฺถเย ฯ ๒ ม. โอสิญฺจํ ฯ เอวมุปริปิ ฯ ๓ ม. อพฺพหี ฯ #เอวมุปริปิ ฯ