กุชนฺตมุปกุชนฺติ โลมหํสา หทยงฺคมํ ฯ

[๑๙๐๕] มิตฺตํ สหายํ อธิคมฺม ปณฺฑิโต

โส ภุญฺชติ ปุตฺตํ ปสุํ ธนํ วา

อหญฺจ ปุตฺตา จ ปตี จ มยฺหํ

มิตฺตานุกมฺปาย สมงฺคิภูตา ฯ

ราชวตา สุรวตา จ อตฺโถ

สมฺปนฺนสขิสฺส ภวนฺติ เหเต

โส มิตฺตวา ยสวา อุคฺคตตฺโต

อสฺมิญฺจ โลเก โมทติ กามกามิ ฯ

[๑๙๐๖] กรณียานิ มิตฺตานิ ทลิทฺเทนาปิ เสนก

ปสฺส มิตฺตานุกมฺปาย สมคฺคมฺหา สญาตเก ฯ

สูเรน พลวนฺเตน โย มิตฺตํ ๑ กุรุเต ทิโช

เอวํ โส สุขิโต โหติ ยถาหํ ตฺวญฺจ เสนกาติ ฯ

มหาอุกฺกุสชาตกํ ตติยํ ฯ

____________

๔ อุทฺทาลกชาตกํ

[๑๙๐๗] ขราชินา ชฏิลา ปงฺกทนฺตา

ทุมฺมกฺขรูปา เย มนฺตํ ๒ ชปนฺติ

กจฺจิ นุ เต มานุสเก ปโยเค

อิทํ วิทู ปริมุตฺตา อปายา ฯ

#๑ ม. มิตฺเต ฯ สี. เมตฺเต ฯ ๒ สี. ยุ. ทุมฺมุขรูปา เย เม ฯ