[๑๘๒] ยมฺหิ สจฺจญฺจ ธมฺโม จ อหึสา สญฺญโม ทโม
เอตทริยา เสวนฺติ เอตํ โลเก อนามตนฺติ ฯ
อุปสาฬฺหกชาตกํ ฉฏฺฐํ ฯ
___________
๗ สมิทฺธิชาตกํ
[๑๘๓] อภุตฺวา ภิกฺขสิ ภิกฺขุ น หิ ภุตฺวาน ภิกฺขสิ
ภุตฺวาน ภิกฺขุ ภิกฺขสฺสุ มา ตํ กาโล อุปจฺจคา ฯ
[๑๘๔] กาลํ โวหํ น ชานามิ ฉนฺโน กาโล น ทิสฺสติ
ตสฺมา อภุตฺวา ภิกฺขามิ มา มํ กาโล อุปจฺจคาติ ฯ
สมิทฺธิชาตกํ สตฺตมํ ฯ
___________
๘ สกุณคฺฆิชาตกํ
[๑๘๕] เสโน พลสา ปตมาโน ลาปํ โคจรฏฺฐายินํ
สหสา อชฺฌปตฺโตว มรณํ เตนุปาคมิ ฯ
[๑๘๖] โสหํ นเยน สมฺปนฺโน เปตฺติเก โคจเร รโต
อเปตสตฺตุ โมทามิ สมฺปสฺสํ อตฺถมตฺตโนติ ฯ
สกุณคฺฆิชาตกํ อฏฺฐมํ ฯ
___________
๙ อรกชาตกํ
[๑๘๗] โย เว เมตฺเตน จิตฺเตน สพฺพโลกานุกมฺปติ