[๘๗๔] อชฺช สุเวติ ปุริโส สทตฺถํ นาวพุชฺฌติ
โอวชฺชมาโน กุปฺปติ เสยฺยโส ๑ อติมญฺญติ ฯ
[๘๗๕] ทวปฺปลุทฺโธ ๒ ปุริโส สพฺพมิตฺเตหิ ธํสติ
โส มยฺหํ ปุริโส กนฺโต ตสฺมึ โหมิ อนามยา ฯ
[๘๗๖] อเปหิ เอตฺโต ตฺวํ กาฬิ เนตํ อเมฺหสุ วิชฺชติ
อญฺญํ ชนปทํ คจฺฉ นิคเม ราชธานิโย ฯ
[๘๗๗] อหมฺปิ โข ตํ ๓ ชานามิ เนตํ ตุเมฺหสุ วิชฺชติ
สนฺติ โลเก อลกฺขิกา สงฺฆรนฺติ พหุํ ธนํ
อหํ เทโว จ เม ภาตา อุโภ นํ วิธมามเส ฯ
[๘๗๘] กา นุ ทิพฺเพน วณฺเณน ปฐพฺยา สุปติฏฺฐิตา
กา วา ตฺวํ กสฺส วา ธีตา กถํ ชาเนมุ ตํ มยํ ฯ
[๘๗๙] มหาราชสฺสหํ ธีตา ธตรฏฺฐสิรีมโต ๔
อหํ สิรี จ ลกฺขี จ ภูริปญฺญาติ มํ วิทู
โอกาสํ ยาจิโต เทหิ วเสมุ ตว สนฺติเก ฯ
[๘๘๐] กึสีเล กึสมาจาเร ปุริเส นิวิเส ๕ ตุวํ
ปุฏฺฐา เม ลกฺขิ อกฺขาหิ ยถา ชาเนมุ ตํ มยํ ฯ
[๘๘๑] โย จาปิ สีเต อถวาปิ อุเณฺห
วาตาตเป ฑํสสิรึสเป จ
ขุทฺท ๖ ปิปาสํ อภิภุยฺย สพฺพํ
รตฺตินฺทิวํ โย สตตํ นิยุตฺโต
#๑ ม. เสยฺยํ โส ฯ ๒ ยุ. ทวปฺปลทฺโธ ฯ ๓ สี. เจตํ ฯ ๔ ม. ธตรฏฺฐสฺส สิรีมโต ฯ #๕ ม. นิวิสเส ฯ ๖ ม. ขุธํ ฯ ยุ. ขุทํ ฯ