อถ เกน เสนโก พาโล ตํ เม อกฺขาหิ ปุจฺฉิโต ฯ
[๙๐๙] อุตฺตมตฺถํ ลภิตฺวาน ภริยาย ๑ โย ปทสฺสติ
เตน ชหิสฺสตตฺตานํ สา เจวสฺส น เหสฺสติ ฯ
[๙๑๐] น ปิยมฺเมติ ๒ ชนินฺท ตาทิโส
อตฺตํ นิรงฺกตฺว ปิยานิ เสวติ
อตฺตาว เสยฺโย ปรมาว ๓ เสยฺโย
ลพฺภา ปิยา โอจิตตฺเตน ๔ ปจฺฉาติ ฯ
ขุรปุตฺตชาตกํ ปฐมํ ฯ
____________
๒ สูจิชาตกํ
[๙๑๑] อกกฺกสํ อผรุสํ ขรโธตํ สุปาสิยํ
สุขุมํ ติขิณคฺคญฺจ โก สูจึ เกตุมิจฺฉติ ฯ
[๙๑๒] สุมชฺชญฺจ สุปาสญฺจ อนุปุพฺพสุวตฺติตํ ๕
ฆนฆาติมํ ปฏิตฺถทฺธํ โก สูจึ เกตุมิจฺฉติ ฯ
[๙๑๓] อิโตทานิ ปตายนฺติ สูจิโย พลิสานิ จ
โกยํ กมฺมารคามสฺมึ สูจึ วิกฺเกตุมิจฺฉติ ฯ
[๙๑๔] อิโต สตฺถานิ คจฺฉนฺติ กมฺมนฺตา วิวิธา ปุถู
โกยํ กมฺมารคามสฺมึ สูจึ วิกฺเกตุมรหติ ๖ ฯ #๑ ยุ. ภริยา ฯ ๒ ม. นเว ปิยมฺเมติ ฯ ๓ ม. ปรมา จ ฯ ๔ ม. โอจิตตฺเถน ฯ #๕ สี. อนุปุพฺพํ สุวฑฺฒิตํ ฯ ม. อนุปุพฺพํ สุวฏฺฏิตํ ฯ ๖ ม. วิกฺเกตุมิจฺฉติ ฯ