[๒๐๖๕] โน เจ ตุวํ อุสฺสหเส ชนินฺท

กาเม อิเม มานุสเก ปหาตุํ

ธมฺมึ ๑ พลึ ปฏฺฐปยสฺสุ ราช

อธมฺมกาโร จ เต ๒ มาหุ รฏฺเฐ ฯ

ทูตา วิธาวนฺตุ ทิสา จตสฺโส

นิมนฺตกา สมณพฺราหฺมณานํ

เต อนฺนปาเนน อุปฏฺฐหสฺสุ

วตฺเถน เสนาสนปจฺจเยน จ ฯ

อนฺเนน ปาเนน ปสนฺนจิตฺโต

สนฺตปฺปย สมณพฺราหฺมเณ จ

ทตฺวา จ ภุตฺวา จ ยถานุภาวํ

อนินฺทิโต สคฺคมุเปหิ ฐานํ ฯ

สเจ จ ตํ ราช มโท สเหยฺย

นารีคเณหิ ปริวารยนฺตํ ๓

อิมเมว คาถํ มนสิกโรหิ

ภาเสหิ เจตํ ๔ ปริสาย มชฺเฌ ฯ

อพฺโภกาสสโย ชนฺตุ วชนฺตฺยา ขีรปายิโต

ปริกิณฺโณ สุวาเนหิ ๕ สฺวาชฺช ราชาติ วุจฺจตีติ ฯ

จิตฺตสมฺภูตชาตกํ ทุติยํ ฯ

#๑ สี. ยุ. ธมฺมํ ฯ ๒ ม. ตว ฯ ๓ ม. ปริจารยนฺตํ ฯ ๔ ม. ภาเสสิ เจนํ ฯ #๕ สี. ยุ. สุปิเนหิ ฯ