ทตฺวาน มานุสํ ๑ จกฺขุํ ลทฺธํ (เม) จกฺขุํ อมานุสํ ฯ

เอตํปิ ทิสฺวา สีวิโย เทถ ทานานิ ภุญฺชถ

ทตฺวา จ ภุตฺวา จ ยถานุภาวํ

อนินฺทิตา สคฺคมุเปถ ฐานนฺติ ฯ

สีวิราชชาตกํ ตติยํ ฯ

___________

๔ สิริมนฺทชาตกํ ๒

[๒๐๘๔] ปญฺญายุเปตํ สิริยา วิหีนํ

ยสสฺสินํ วาปิ อเปตปญฺญํ

ปุจฺฉามิ เสนก เอตมตฺถํ

กเมตฺถ เสยฺโย กุสลา วทนฺติ ฯ

[๒๐๘๕] ธีรา จ พาลา จ หเว ชนินฺท

สิปฺปูปปนฺนา จ อสิปฺปิโน จ

สุชาติมนฺโตปิ อชาติมสฺส

ยสสฺสิโน เปสกรา ๓ ภวนฺติ

เอตมฺปิ ทิสฺวาน อหํ วทามิ

ปญฺโญ นิหีโน สิริมาว เสยฺโย ฯ

[๒๐๘๖] ตุวมฺปิ ปุจฺฉามิ อโนมปญฺญ

มโหสธ เกวลธมฺมทสฺสิ

พาลํ ยสสฺสึ ปณฺฑิตํ อปฺปโภคํ

#๑ สี. ทตฺวา มานุสกํ ฯ ๒ ม. สิริมนฺตชาตกํ ฯ ๓ สี. ยุ. เปสฺสการา ฯ