อสมฺภีตา จ เต พุทฺธา มิคราชาว เกสรี

เนวุกฺกํเสนฺติ อตฺตานํ โน จ วมฺเภนฺติ ปาณินํ ฯ

มานาติมานโต ๑ มุตฺตา สมา สพฺเพสุ ปาณิสุ

อนตฺตุกฺกํสกา พุทฺธา พุทฺธานํ เอส ธมฺมตา ฯ

อุปฺปชฺชนฺตา จ สมฺพุทฺธา อาโลกํ ทสฺสยนฺติ เต

ฉพฺพิการํ ๒ ปกาเสนฺติ ๓ เกวลํ วสุธํ อิมํ ฯ

ปสฺสนฺติ นิรยญฺเจเต นิพฺพาติ นิรโย ตทา

ปวสฺสติ มหาเมโฆ พุทฺธานํ เอส ธมฺมตา ฯ

อีทิสา เต มหานาคา อตุลา เต ๔ มหายสา

วณฺณโต อนติกฺกนฺตา อปฺปเมยฺยา ตถาคตา ฯ

อนุโมทึสุ เม วากฺยํ สพฺเพ สิสฺสา สคารวา

ตถาว ๕ ปฏิปชฺชึสุ ยถาสตฺติ ยถาพลํ ฯ

ปฏิปูเชนฺติ ปุฬินํ เต ๖ สกมฺมาภิลาสิโน

สทฺทหนฺตา มม วากฺยํ พุทฺธตฺตคตมานสา ๗ ฯ

ตทา จวิตฺวา ตุสิตา เทวปุตฺโต มหายโส

อุปฺปชฺชิ มาตุกุจฺฉิสฺมึ ทสสหสฺสิ กมฺปถ ฯ

อสฺสมสฺสาวิทูรมฺหิ จงฺกมมฺหิฏฺฐิโต อหํ

สพฺเพ สิสฺสา สมาคนฺตฺวา อาคจฺฉฉ มม สนฺติเก ฯ

อุสโภว มหิ นทติ มิคราชาว กุชฺชติ

สสสุมาโรว สฬติ ๘ กึ วิปาโก ภวิสฺสติ ฯ #๑ ม. ยุ. มานาวมานโต ฯ ๒ ม. ฉปฺปการํ ฯ ๓ ยุ. ปกมฺเปนฺติ ฯ ๔-๕ ม. ยุ. จ ฯ #๖ ม. ยุ. อยํ ปาโฐ นตฺถิ ฯ ๗ ม. พุทฺธสกฺกตมานสา ฯ ๘ ยุ. สทฺทติ ฯ