ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา สรณคมนิโย เถโร อิมา คาถาโย อภาสิตฺถาติ ฯ
สรณคมนิยตฺเถรสฺส อปทานํ สมตฺตํ ฯ
จตุตฺถํ อพฺภญฺชนทายกตฺเถราปทานํ (๕๒๔)
[๑๑๔] นคเร พนฺธุมติยา ราชุยฺยาเน วสามหํ
จมฺมวาสี ๑ ตถา อาสึ กมณฺฑลุธโร อหํ ฯ
อทฺทสํ วิรชํ ๒ พุทฺธํ สยมฺภุํ อปราชิตํ
อาตาปินํ ๓ ปหิตตฺตํ ฌายึ ฌานรตํ อิสึ ๔ ฯ
สพฺพกามสมิทฺธิญฺจ โอฆติณฺณมนาสวํ
ทิสฺวา ปสนฺโน สุมโน อพฺภญฺชนมทาสหํ ฯ
เอกนวุเต อิโต กปฺเป ยํ ทานมททึ ตทา
ทุคฺคตึ นาภิชานามิ อพฺภญฺชนสฺสิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ยุ. ธมฺมวาที ฯ ๒ ม. วิมลํ ฯ ๓ ม. ยุ. ปธานํ ปหิตตฺตํ ตํ ฯ ๔ ม. ยุ. วสึ ฯ